游船河

2007年6月25日 星期一 晴
今日冇帶個魂魄返工，可能尋日反得太癲啦，晒得太勁，而家周身冇力， 諗諗吓都有成廿年冇游海水啦，覺得D海水比以前咸咗好多， 一落海已經好驚，唔感游太遠，唔係因為响海中心水太深嘅原故， 而係之前聽到西貢有鯊魚出沒，D水又混濁咗咁多，見唔到水入面D有乜， 游游吓唔知會唔會有一條鯊魚响左近呢陪我游架，所以可驚囉， 需然係咁都有落水暢泳。
話就話嗰到係西貢叫大清水，但係真係變咗好多，水唔再清啦，記得廿年前去西貢燒嘢食游船河， 隻船去到附近靠岸時，D水仍然好清重見到個海底同D魚魚架， 當時一馬當先咁跳咗落水，同行D同事叫都叫我唔切要小心D呀好深水架，呢到果然好深水架，需然識游水好耐，但係都協一協， 因為插咗好耐水都未到底，可想當時D水有幾清啦， 而家~唉!不過都算好啦能見度有1米左右，比起其他泳灘嚟講算好囉， 地球村D人，請愛護環境，唔係再過多廿年唔使游海水啦。

完成第三支針

2007年6月14日 下雨天
終於幫CO CO打埋第三支疫苗，再過多一個月左右就可打瘋狗針同植晶片咁出街就唔怕比差人拉啦，今日比我發現佢開始換牙喇，一隻一隻咁換超過癮。

時間過得好快~~晴

2007年06月02日 星期六 晴

我已經養咗 CO CO 46日 佢係女仔嚟架

教緊佢點用個新廁所，10號可以打埋第3支免疫針，

攞埋狗牌咁就可以名正言順出街街，唔使驚比差人拉 哈哈。

合桃蛋糕

今日本想整一個合桃蛋糕，已經將合桃放咗落個焗爐到焗，點知電話响叫去飲茶咁就忘記咗，返到屋企燶晒，咁就轉整牛油蛋糕啦。

等待新生命的來臨

我啡啡走咗差不多兩個月喇，呢段日子都非常寂寞好唔慣，每每走過寵物店都注足停步望住D狗仔，經常比D可愛狗仔給吸引住，好想好想買隻回家，但係心諗我又驚唔知可否照顧一隻BB狗呢，終於有朋友問我要唔要史納莎因為有一竇就嚟出世啦，要就比一隻我，我諗都唔諗一口答話要要要，祈待小狗狗來臨。

星期六怪事繼續

繼續啦......
打到11點左右，個個睡眼惺忪之際亞毛對手更不受控撞跌D麻雀，跟住執返再打多一舖就走啦，我哋開始清場執麻雀，當排好麻雀入盒後以為剛剛好，點知發覺地上竟然有一隻麻雀响到，咁就諗住擺返好佢喇，咦 咦 咦 點解重爭一隻嘅，於是認真咁尋找咗半個鐘任何一角落都找過都無發現，我哋開始有D驚，用最快速度離開，乘車回家。連平時行路嘅葵葵都一齊搭車你哋話啦當時係未好驚呢，無啦啦唔見咗隻麻雀喎....................

難得的星期六

今日下晝亞毛已經問我夜D得閑嗎，心想老公返咗鄉下打波，奶奶又話去飲，本來打算返亞媽到睇兩個姨娚生，不過見亞毛喱牌心情唔多靚，又出聲叫到好啦就應承佢啦，陪吓佢玩吓喇，於是就留响公司玩啦，我、毛毛、葵葵、VV、同SALALA 五個人玩，玩咩，原本亞SA 帶咗副好細隻嘅馬吊即係麻雀反嚟咁我哋就開戰啦，亞SA因為唔識打，於是亞毛用咗45分鐘解釋如何如何打，當佢哋明明地嘅時就開始打啦，一路打到外賣到為止，都成9時9 o架，食完再打，但怪事就發生咗.....................................(待續)......................................