越來越大膽

2008年2月26日 星期二 晴天
琴晚收工食埋飯先返屋企，例牌CO CO梗會走出嚟歡迎我，同佢玩咗一陣比咗DD零食佢食吓先，本想同佢沖涼，但又夜又凍都係算吧，睇下無線嗰套電視劇乜乜第七天，奇怪點解咁靜嘅，CO CO去咗邊，搵搵吓發覺佢原來上床瞓覺，不過係上咗我張床啫。

話咁快就過咗年

2008年2月15日 星期五 陰天 寒冷

今日已經年初九啦，開咗一個禮拜工，天氣依然寒冷，今次都凍得耐啦，

是次寒流真帶旺整個市面，起碼市面嘅羽絨、暖爐、發得熱嘅物品都賣清光

時裝店不知幾好生意，去到大型百貨公司更加人山人海，我也襯高興走去買

暖爐但去到嘅時全部都賣光，訂貨都唔知幾時有喎，真利害。
年初二起程返大陸拜年及旅遊，留低CO CO响屋企，叫咗華父上嚟餵佢同執，華父都算唔話得次次都幫我攪掂。

華父

停工

2008年1月30日 星期三 陰天 寒冷

由於天氣寒冷，我已經暫停無繡啦，兼且又係月尾就更加要早D睏覺等朝頭早可以早D起身。

可憐天下狗媽心!!!

2008年1月20日 星期一 晴天
今日又要帶CO CO 睇醫生啦，事原尋日同CO CO剪定個新妝過新年，都唔知係沖涼時整傷隻眼，還是個新妝冇咗兩旁眉呢，比D不明物體入眼，响我哋食晚飯時開始發覺CO CO唔妥，成日合埋眼訓覺，同平時為食扎扎跳嘅佢明顯唔同，初時重估佢响狗店嗰時緊張過渡所以好攰返嚟就想訓覺，但到左九點幾十點時，我哋見佢好用力咁閉咗隻眼，我想睇吓佢隻眼佢就更加用力閉實唔比我掂，我又冇眼藥水响到都唔知點算，於是打返比狗舖個人問吓了解沖涼情況及用D乜嘢梘液，狗舖個人教我用眼藥水清潔隻眼重專程送咗支眼藥水過嚟比我用住先，攪咗一輪CO CO 好乖咁訓咗，到今朝五點再檢查佢隻眼冇乜好轉，依然好多分泌物流出，再一次清潔滴眼藥水，而家BOOK咗時間等睇醫生。

希望完工的工程

2008年1月16日 星期三 天晴 寒冷

大約兩個星期前，見到MO MO 同SALALA 玩十字繡，唔得我又要玩埋一份，於是收工就跟咗佢哋去置樂買咗一幅嚟玩，不過我買咗嗰幅就非常難繡，事關好大幅架，有成四呎乘兩呎咁大，第一晚用咗四個半鐘頭就只係繡咗咁多咋

而呢幅就繡咗差不多兩個星期啦 >.<

唉都唔知要繡到幾時先玩啦..一年...兩年或是更多......

星期六 的工作日

2008年1月5日 星期六 晴天 寒冷
今日比起前幾天已經暖返好多，陽光普照天氣下心情都特別好，雖然知道今年加薪無望，
講時講好快就到農曆新年啦，哈!知道公司今年又唔駛做7仔D盆菜開心死啦，新年期間就唔駛留守公司啦。

今年加薪被BAN了

2008年1月4日 星期五 晴天
尋日收到消息，加薪無望la，事關MC話我哋D工作量同人工成正比喎，冇特別增加嘅必要，咁又係嘅以現時人工嚟講應該合付市價值，反正我都預左唔會有人工加架啦，過時過節可以休埋下半天都心滿意足啦。^.^